Тукай премиясе буенча референдум булса, Арчаларга кыен булыр иде 😊Наил Касыймов - Арчаныкы, якташ буларак тавыш бирергә кирәк. Ә Флера Гыйззәтуллина "Арча гимны"н язган. Әмма "Арча гимны" шәп - мин Флера Гыйззәтуллинага тавыш бирәм). Ул чын гимн язган. Дөньяда нәрсә бар - барысын да Арчага биреп бетергән рәхмәт яугыры, үзе Азнакай кызы булса да. Ак каеннарга, йолдызларга кадәр Арчага алып бетергән : ) Арча кызы язса, и, мактанчыклар диярләр иде, болай бит читтән караш - дөресен язган димәк:)
Флёра Гыйззәтуллина шигыре
Риф Гатауллин көе
Илһам нуры җанны чорнап ала,
Ак каеннар шаулап яфрак яра.
Изге манаралар күккә ашып,
Азан әйтеп таңны каршы ала.
Кушымта:
Ак каеннар Ватаны син, Арча!
Илһамият Ватаны син, Арча!
Изге моңнар Ватаны син, Арча!
Ватанымның ал таңы син, Арча!
Һәр юлчыга яшел яфрак изәп,
Арча җырын җырлый ак каен –
Мөхәммәттәй затлы туган телем,
Халкым кебек тугры Тукаем!
Кушымта:
Бөек Тукай Ватаны син, Арча!
Мөхәммәтләр Ватаны син, Арча!
Ай-йолдызлар Ватаны син, Арча!
Ватанымның ал таңы син, Арча!
Җидегән чишмәләрдән ургылган моң
Яшьлегеңә, Арча, кыйбла ача!
Мәрҗаниләр, Курсавилар рухы
Гыйлем тавы булып алга баса.
Кушымта:
Рухи таулар Ватаны син, Арча!
Сулмас яшьлек Ватаны син, Арча!
Дан-шөһрәтләр Ватаны син, Арча!
Ватанымның ал таңы син, Арча!